4. Вѣра что есть.
«Вѣра есть даръ Божій и людей спасаетъ,
але злая ересь души погубляетъ.
Вѣра праведниковъ на судѣ прославитъ
и предъ лицемъ Божіимъ съ святыми ставитъ.
Вѣра спасенію пріятель зичливый 1),
и наставникъ грѣшнымъ, и путь добротливый.
Вѣра до царства Божіего приведетъ,
а ересь въ пагубу вѣчную заведетъ.
Вѣра и отъ смерти многихъ избавляетъ,
и слугамъ божіимъ въ бѣдахъ помогаетъ.
Вѣра живетъ съ Богомъ и въ ней всѣ во Бозѣ,
и вѣрныи души ставаются блази.
Вѣра христіаномъ все творити можетъ
сила бо Божія таковымъ поможе.
Тѣсною стезею до Христа приходятъ,
але широкою въ пагубу отходятъ.
Не хотѣможъ Христа снова роспинати,
а ни крещенія второ поновляти.
Не слухайте лживыхъ учителей новыхъ,
иже отлучаютъ отъ бесѣдъ Христовыхъ. {88}
Западная мати не насъ породила,
але прегордыи дѣти исплодила.
Блудная бо церковь нѣсть Христова дѣва,
держащая кубокъ Господнего гнѣва.
Скверная, сквернити людей навыкаетъ,
и отъ спасенія хитро отдѣляетъ.
Превелія бѣда Риму работати
и новаго Христа себѣ измышляти.
Премногаяжъ цнота 2) Сіону служити
и Святого Духа уставы хранити.
Якъ чистое злато Господніи слова,
сильнѣйшая огня отъ устъ Его мова.
Изъ Іерусалима вѣрнымъ даровано,
и всю вселенную Богови призвано.
Восточная церковь правдивая мати,
весь свѣтъ породила духомъ благодати.
И чистою дѣвою Христу обручена,
тѣломъ и кровію Его освященна.
Иже прегордому папѣ не голдуетъ 3),
и Христу цареви вѣру заходуетъ.
Златоструйный потокъ любимицы пійте,
отческую вѣру хранити умѣйте.
Якъ святыи книги намъ оповѣдаютъ,
и всякую ересь явно обличаютъ.
Памятайте пыльно о убогомъ Христѣ,
который за люди умиралъ на крестѣ,
И на поклонную Оного покору,
иже росказуетъ ангельскому збору 4).
Якъ за наши грѣхи безчестіе пріялъ
и васъ отъ падку милостію поднялъ.
Не мнимайтежъ 5) папу Христову особу,
а ни чудитеся на его оздобу 6),
Иже есть змышленный, не Христовъ апостолъ,
и похитительно держитъ Его престолъ. {89}
Наука и животъ нѣсть ему духовный,
яко блаженный апостолъ верховный.
Познавайтежъ разумно пастыри и волки,
и не лучитеся въ невѣрныя полки.
Не хочетъ Богъ едности не по Его волѣ,
и за то караетъ, абы его знали,
Потокомъ и огнемъ непокорныхъ,
тылу и грѣхови и мирови вгодныхъ.
Великъ есть Богъ, Судія грозный всему свѣту,
предъ которымъ станутъ папы того вѣку,
Которые смѣютъ Христовы декрета
вельми зневажати для марнаго злата.
Ламлючи каноны и вызванье вѣры,
и власти шукаютъ, яже вышшей мѣры.
Жидовскій опрѣснокъ честію почтили,
а тайную вечеру Христову змѣнили.
Якъ мертвого трупа, оплатка глытаютъ,
а Христа живого въ хлѣбѣ отмѣтаютъ.
Посполитый народъ безъ крове Христовы
сакраментуючи, утѣшаютъ словы.
И дѣти малыи съ ними отлучаютъ,
o горе, о горе, и сами згибаютъ.
Тамъ правдивый агнецъ съ костела изгнано,
абы жидовскую пасху праздновано». {90}
1) Доброжелательный. {88}
2) Cnota, добродѣтель, доброе качество.
3) Зн. не подчиняется.
4) Который повелѣваетъ, правитъ ангельскимъ соборомъ.
5) Не считайтежъ папу за лицо Христово.
6) Osdoba зн. украшеніе, уборъ, убранство. {89}
Добротворский А. Загоровский монастырь, его библиотека и сохранившийся в ней западнорусский литературный памятник XVII-го столетия // Вестник Юго-Западной и Западной России. 1863. № 8. Отдел 2. С. 88‒90.
А всего у вас 17 банов. Конкретнее ориентиры укажите. В какой теме искать хотя бы.
